Yr.3_31/7/08_接待外賓

舅父舅母今日放假，專程遠道而來，話晒都係第一批到訪舍下嘅賓客，我當然係要以最高規格去接待，所以我帶咗副「黑超」。

Yr.3_27/7/08_廿七個秋

正所謂「一日不見如隔三秋」，屈指一算，Daddy媽me最近去咗馬來西亞短期宣教，我同佢哋分隔兩地都有廿七個秋！佢哋回港當日，急不及待去藍地見我。其實，我仲未可以返西灣河新居瞓我張私家床，因為Daddy媽me打算用多一日執拾新屋，怕我在場指揮影響進度。
當晚，我哋同爺爺嫲嫲、公公婆婆、姑媽、姑姐喺藍地晚飯，媽me一見我就嚟一個熊抱，我伏喺媽me心口，用嬌嗲嘅聲線，講咗幾聲︰「媽me媽me……」佢即刻頂唔住，吧吧聲喊咗出嚟，我都被嚇呆咗。佢話好掛住我，原來廿七個秋冇見就會咁嘅！你哋可能睇唔到，其實我都有眼濕濕，只不過我帶咗媽me喺馬來西亞機場買俾我嘅太陽眼鏡遮一遮，但係婆婆同姑媽冇收到lee個手信，所以就遮唔到淚眼啦！

Yr.3_22/7/08_藍地玩具部

我搬咗屋之後，我嘅玩具有部份仲留守喺屯門，但係唔係大興花園，而係公公婆婆喺藍地嘅屋企，所以嗰度有個玩具部，等我間中去佢哋屋企渡假嘅時候玩。趁Daddy媽me去咗馬來西亞，我去咗藍地為玩具部開幕舉行剪綵儀式，兼渡假幾日。

Yr.3_20/7/08_樂在泳池

今日婆婆帶我去泳池游水，好好玩！其實，嵐嵐珉珉姊妹花都有一齊去，我哋仲影咗一啲性感泳裝照tim，不過，唔方便喺lee度公開，sor。

Yr.3_18/7/08_新居入伙

我搬咗去新居啦！噚日，我哋由屯門搬咗去西灣河。依家我仲有自己間房tim，Daddy媽me話等細佬或者細妹出世之後，我哋就可以一齊瞓啦！經過一日，我間房執好咗，公公婆婆先至帶我去睇下，因為噚日搬屋嘅時候我唔需要在場指揮。我好開心呀！史迪仔床舖好靚呀，而且叮噹、Pooh Pooh、毛毛、Barney佢哋全部都喺新屋等我！不過，今晚我仲未喺度瞓，因為Daddy媽me明早會出發去馬來西亞作短期宣教，而我就會喺公公婆婆屋企渡假九日。Daddy媽me加油呀！我會乖乖等你哋返嚟！

Yr.3_14/7/08_踩單車

三輪車都唔係好識踩，竟然喺百貨公司試踩有輔助輪嘅單車，Daddy媽me都估我唔到！我仲唱起歌嚟！自得其樂！lee架巴斯戰車，只不過係我試踩嘅其中之一架嚟啫！

Yr.3_11/7/08_食得拼命

我咁嘅食相，只係食生日蛋糕嘅時候先至會見到。舅母問我個口最盡可以擘到幾大，我立刻表演俾佢睇，大家都讚嘆不已。婆婆，生日快樂！我差啲又以為自己生日tim，蠟燭都係由我吹埋。

Yr.3_7/7/08_搬家在即

我哋就嚟搬離屯門啦，所以今日daddy媽me趁住放假，成家人去屯門市中心飲茶，順便買下傢俬、電器。傍晚，我哋仲去咗沙田Ikea，爺爺嫲嫲都有去，果然係旗艦店，有木馬騎！之後姑媽加入晚上嘅飯局。

Yr.3_26/6/08_跳over

今晚，媽me同我一齊創作玩意，玩跳over。我哋用氣球做出唔同難度嘅障礙物，我全部都跳到，好好玩！

Yr.3_25/6/08_我有份起

「lee座紅碪香港體育館，我有份起o架！」廿年前，有人經常喺電視上好叻咁講過類似嘅說話。今日，我都要講下先，lee座大廈我有份起o架，幾高！高過我少少咁啦，即係1米多啲，我依家就夠1米高，就嚟夠高玩波波池，好嘢！

Yr.3_23/6/08_下水禮

今日，Daddy媽me放假，帶我去海難玩，進行本年度o既下水禮，我又再以一襲性感泳衣示人。

Yr.3_18/6/08_鏡頭Vs美食

「影相呀，望鏡頭啦，在恩！」你哋知道我心有所屬，我好想快啲食呀，未食得住，梗係望住啲嘢食啦！今日，難得舅父舅母放假，約我去食tea buffet，美食當前，最好唔好叫我望鏡頭。又有得嘆一餐，多謝舅父舅母！可惜，Daddy媽me今餐冇得嘆。佢哋又話我咁鍾意食嘢，怕我變肥妹。

Yr.3_16/6/08_飛碟

今日，我玩飛碟。

Yr.3_15/6/08_形！

lee個係乜嘢動作？指定動作囉，係我哋o既婆婆叫我哋咁做。影相嘛！形！

Yr.3_9/6/08_南丫島遊

南丫島風光好
結伴遊樂趣高
吹波波我用槍
玩泥沙好緊張

好句！好句！

Yr.3_8/6/08_非常冒險

今日，我去咗米國冒險樂園玩。其實，我唔係第一次去，不過，今次係Daddy媽me主動提出帶我入去，話同我坐火車。Daddy臨入去o既時候，心諗今次好可能係一個冒險，因為恐怕我玩完都會賴死唔肯走，點知真係！Daddy媽me前後「唱」咗40「蚊」代幣，我玩咗火車、氣墊球、保齡球、掟波同埋打鴨仔之後，Daddy媽me話係時候走，但係我覺得仲未夠喉。於是，扭起計嚟，又坐地、又瞓地、又喊又叫，Daddy媽me點「氹」我都唔聽，媽me嚟最後一招︰自己走，我唯有死死地氣咁跟住走。

Yr.3_3/6/08_度高

你哋睇下，我幾高呢？有咁高！即係幾高呀？仲未夠長頸鹿高囉！

Yr.3_2/6/08_我自己

今日，我去遊樂場玩肥皂泡，再次自己吹波波，吹得越嚟越叻！我大過女喇，依家乜都想由我自己嚟做，就連過馬路都係。有次，媽me拖著我，當準備過馬路嗰刻，我突然撥開媽me隻手想自己走過去，媽me即刻捉住我，問我做乜唔拖著佢，我好狠咁答佢︰「我自己！」之後，俾媽me鬧，自此就無再咁做。其實，我嗰次咁做，係好唔啱，我仲細，有啲嘢係唔可以「我自己」，咁做會好傷Daddy媽me心。我知道啦！

Yr.3_31/5/08_兒童作狀期

我已經進入「兒童作狀期」（Daddy稱之為），特徵︰每當有人舉起相機幫我拍照時，我會盡量作狀，交足戲。lee個動作啱啱喺我o既朋友仔身上學番嚟，cutie唔cutie？

Yr.3_26/5/08_娃娃裙

今日我返學啦！其實，未係正式上學，係辦理入學手續至真。當收到學校寄嚟有關通告o既時候，Daddy媽me不約而同，一睇到女裝校服稱為「娃娃裙」都不禁發笑。今日，買咗校服即場試著，好一條娃娃裙，好啱身、好醒目！仲有運動服o添！我哋成家人都好期待今日o既到來，daddy媽me呢幾個星期不時同我講今日係返學o既日子，我自己都知道返邊間學校o架，我o既講法係「培理稚園」。之前，有次外出晚飯，有位姨姨問我喺邊度返學，我答佢︰「稚園。」佢話︰「寺院邊有學返o架？」攪笑！講番今日，都有一件攪笑事發生。返學對於我嚟講，係同一班小朋友一齊玩，所以一到學校我就嚷著要玩。喺媽me忙於填寫各樣資料o既時候，我又想畫埋一份，於是媽me叫daddy帶我開去玩，我問daddy要嘢玩，daddy就話我要自己問下校長，我就即刻走到校長面前問佢，daddy都估唔到我真係會問。一啲都唔怕羞！不過……冇嘢玩，校長話遲啲當開學就可以玩。

Yr.3_17/5/08_無片生活

大約半個月前，經過諾禧小妹妹o既鼓勵，我無再用「站立式痾便」，而改用「坐塔式痾便」。今個星期我仲開始用大人屎塔（當然有用「塔板轉換器」啦！好穩陣o架！）唔只咁，我依家仲唔用尿片！（大家唔使緊張，我有著褲仔！）Daddy讚我進步神速，我都係要多謝婆婆喺上廁所方面o既悉心教導。

Yr.3_11/5/08_家姐母親節

今年係我第一次以家姐身份過母親節，媽me！婆婆！母親節快樂呀！好嘢！又食一餐。

Yr.3_10/5/08_大長梯

據估計，lee個sir滑梯有1.5層樓咁高，daddy話我咁高都唔驚，好嘢！我玩咗6次，好好玩！

Yr.3_5/5/08_女人係要讚

Daddy叫我影相，有時我會唔理佢。不過，喺影lee張相之前，佢讚咗我一句︰「你今日著得好靚喎！影張相吖！」我就即刻好合作，仲送多個手勢，得意洋洋咁！Daddy話原來女人真係要讚o架，仲要係兩歲就要開始讚。

Yr.3_4/5/08_四朵金花

「金花，四朵金花……將幸福和歡樂帶給每一戶人家！」我哋唔係得個「唱」字，真係咁樣做o架！我哋會先由自己嗰戶人家開始。

Yr.3_1/5/08_我係家姐

自從大家知道媽me有喜之後，最近我經常被問及，鍾意有細佬定細妹。就連daddy媽me都有問過我，但係我冇回應，我淨係知道我係家姐！雖然我唔知道身旁o既諾禧小妹妹屋企o既家庭計劃，但係我睇佢氣定神閒，一定都係做家姐o既好人選。講番啲實際啲o既嘢先，daddy媽me都無乜所謂生仔定生女，佢哋淨係喺度諗堅唔堅持生三個，因為佢哋一直都想啲仔女有多啲兄弟姊妹一齊玩。自我知道我就嚟做家姐o既時候，為咗等daddy媽me對我lee個未來家姐有更大信心，我決定改用另一位「指定抱BB員」，以往我只會揀媽me抱我，依家我只會要一向被拒o既daddy抱我，等媽me可以專心安胎，佢哋都大讚我乖！唔只咁，有時夜晚我會同媽me肚裡面o既BB打招呼，「BB呀，我係家姐呀！」