Yr.3_6/10/08_澳門之行

此行有公公婆婆舅父舅母，仲有舅母嘅父母，當然唔少得我啦！

Yr.3_16/9/08_泳將

我同媽me跟Daddy上大陸參加退修會，好好玩！呢個只係其中一項。我超鍾意游水，我唔怕水深，游到去水中央。不過，喺嗰度搵唔到儷影，皆因我身後嗰位只不過係我教練，而喺佢前面嗰位係一名泳將！

Yr.3_15/9/08_家居電話

啱啱喺新居安裝咗電話，試下先。「喂！請問搵邊位？」

Yr.3_14/9/08_我受得起

樂懿妹妹呢拳都好厲害，衝力好大，你睇佢成個人都震晒就知，捉都捉唔住佢，雖然係咁，但係我受得起！因為我條頸好硬！都唔知係唔係好事……

Yr.3_9/9/08_婆婆送的LEGO

呢套係婆婆喺日本買番嚟送俾我嘅其中一份禮物，鍾意LEGO嘅Daddy都好羨慕。多謝婆婆！

Yr.3_2/9/08_開學禮……物

為咗慶祝我開學成功，Daddy媽me送咗份禮物俾我。唔係呢對roller，呢個只係我喺R城試玩啫，嗰份禮物係playmobil。

Yr.3_1/9/08_開學了

各位同學，早晨！我係校長，我有事宣佈，唔好傾計，要留心聽。所有幼兒班嘅同學，今日係你哋一生人之中第一日返學（N1唔計），所以為咗俾你哋有好嘅適應，我俾你哋嘅家長一齊上課，第二日都係咁嘅安排，明白未？

Yr.3_1/9/08_開學了II

仲有，全日班呢兩日下晝都唔使返學。所以，我把握時機去海洋公園玩，我覺得坐吊車好新奇，我深感興奮！

Yr.3_30/8/08_最後午餐

下星期一我就會正式返學，聽Daddy媽me講，我可以喺學校嘆埋午餐，所以明日個午餐就係我開學前喺街食嘅最後一餐嘞！唔知學校有乜好餸食呢？

Yr.3_27/8/08_自由身

趁未開學、仲係自由身嘅我，約咗公公婆婆去探下米奇先！

Yr.3_22/8/08_朱小姐

考下大家，點樣可以搖身一變變成朱小姐呢？方法好簡單，用兩隻手指就可以嘞！左手或者右手都得，隨你喜歡。

Yr.3_20/8/08_車厘子

好一粒車厘子，好味！

Yr.3_19/8/08_陳醫生

婆婆買咗lee套醫生玩具俾我，我可以四出行醫lu。我係陳醫生，睇醫生嘅，就請登記等叫名，多謝合作！請你吸氣……呼氣……

Yr.3_15/8/08_我揹住Barney

平日Daddy揹得我多，等我試下好似Daddy咁樣揹下Barney先。咦！好似倒轉咗喎！唔好意思呀，Barney！有冇見頭暈呀？

Yr.3_14/8/08_慈善燈籠

我稱呼lee個燈籠做慈善燈籠，係婆婆同我買嘅，證明我做善事不遺餘力。

Yr.3_1/8/08_向上向下

我喜歡食嘢，相信好多人都知，但係我擦牙就唔係個個都見過，亦唔常見，因為我只係識唱首歌仔，仲未養成每日早晚擦牙嘅習慣。

Yr.3_31/7/08_接待外賓

舅父舅母今日放假，專程遠道而來，話晒都係第一批到訪舍下嘅賓客，我當然係要以最高規格去接待，所以我帶咗副「黑超」。

Yr.3_27/7/08_廿七個秋

正所謂「一日不見如隔三秋」，屈指一算，Daddy媽me最近去咗馬來西亞短期宣教，我同佢哋分隔兩地都有廿七個秋！佢哋回港當日，急不及待去藍地見我。其實，我仲未可以返西灣河新居瞓我張私家床，因為Daddy媽me打算用多一日執拾新屋，怕我在場指揮影響進度。
當晚，我哋同爺爺嫲嫲、公公婆婆、姑媽、姑姐喺藍地晚飯，媽me一見我就嚟一個熊抱，我伏喺媽me心口，用嬌嗲嘅聲線，講咗幾聲︰「媽me媽me……」佢即刻頂唔住，吧吧聲喊咗出嚟，我都被嚇呆咗。佢話好掛住我，原來廿七個秋冇見就會咁嘅！你哋可能睇唔到，其實我都有眼濕濕，只不過我帶咗媽me喺馬來西亞機場買俾我嘅太陽眼鏡遮一遮，但係婆婆同姑媽冇收到lee個手信，所以就遮唔到淚眼啦！

Yr.3_22/7/08_藍地玩具部

我搬咗屋之後，我嘅玩具有部份仲留守喺屯門，但係唔係大興花園，而係公公婆婆喺藍地嘅屋企，所以嗰度有個玩具部，等我間中去佢哋屋企渡假嘅時候玩。趁Daddy媽me去咗馬來西亞，我去咗藍地為玩具部開幕舉行剪綵儀式，兼渡假幾日。

Yr.3_20/7/08_樂在泳池

今日婆婆帶我去泳池游水，好好玩！其實，嵐嵐珉珉姊妹花都有一齊去，我哋仲影咗一啲性感泳裝照tim，不過，唔方便喺lee度公開，sor。

Yr.3_18/7/08_新居入伙

我搬咗去新居啦！噚日，我哋由屯門搬咗去西灣河。依家我仲有自己間房tim，Daddy媽me話等細佬或者細妹出世之後，我哋就可以一齊瞓啦！經過一日，我間房執好咗，公公婆婆先至帶我去睇下，因為噚日搬屋嘅時候我唔需要在場指揮。我好開心呀！史迪仔床舖好靚呀，而且叮噹、Pooh Pooh、毛毛、Barney佢哋全部都喺新屋等我！不過，今晚我仲未喺度瞓，因為Daddy媽me明早會出發去馬來西亞作短期宣教，而我就會喺公公婆婆屋企渡假九日。Daddy媽me加油呀！我會乖乖等你哋返嚟！

Yr.3_14/7/08_踩單車

三輪車都唔係好識踩，竟然喺百貨公司試踩有輔助輪嘅單車，Daddy媽me都估我唔到！我仲唱起歌嚟！自得其樂！lee架巴斯戰車，只不過係我試踩嘅其中之一架嚟啫！

Yr.3_11/7/08_食得拼命

我咁嘅食相，只係食生日蛋糕嘅時候先至會見到。舅母問我個口最盡可以擘到幾大，我立刻表演俾佢睇，大家都讚嘆不已。婆婆，生日快樂！我差啲又以為自己生日tim，蠟燭都係由我吹埋。

Yr.3_7/7/08_搬家在即

我哋就嚟搬離屯門啦，所以今日daddy媽me趁住放假，成家人去屯門市中心飲茶，順便買下傢俬、電器。傍晚，我哋仲去咗沙田Ikea，爺爺嫲嫲都有去，果然係旗艦店，有木馬騎！之後姑媽加入晚上嘅飯局。

Yr.3_26/6/08_跳over

今晚，媽me同我一齊創作玩意，玩跳over。我哋用氣球做出唔同難度嘅障礙物，我全部都跳到，好好玩！

Yr.3_25/6/08_我有份起

「lee座紅碪香港體育館，我有份起o架！」廿年前，有人經常喺電視上好叻咁講過類似嘅說話。今日，我都要講下先，lee座大廈我有份起o架，幾高！高過我少少咁啦，即係1米多啲，我依家就夠1米高，就嚟夠高玩波波池，好嘢！

Yr.3_23/6/08_下水禮

今日，Daddy媽me放假，帶我去海難玩，進行本年度o既下水禮，我又再以一襲性感泳衣示人。

Yr.3_18/6/08_鏡頭Vs美食

「影相呀，望鏡頭啦，在恩！」你哋知道我心有所屬，我好想快啲食呀，未食得住，梗係望住啲嘢食啦！今日，難得舅父舅母放假，約我去食tea buffet，美食當前，最好唔好叫我望鏡頭。又有得嘆一餐，多謝舅父舅母！可惜，Daddy媽me今餐冇得嘆。佢哋又話我咁鍾意食嘢，怕我變肥妹。

Yr.3_16/6/08_飛碟

今日，我玩飛碟。

Yr.3_15/6/08_形！

lee個係乜嘢動作？指定動作囉，係我哋o既婆婆叫我哋咁做。影相嘛！形！

Yr.3_9/6/08_南丫島遊

南丫島風光好
結伴遊樂趣高
吹波波我用槍
玩泥沙好緊張

好句！好句！

Yr.3_8/6/08_非常冒險

今日，我去咗米國冒險樂園玩。其實，我唔係第一次去，不過，今次係Daddy媽me主動提出帶我入去，話同我坐火車。Daddy臨入去o既時候，心諗今次好可能係一個冒險，因為恐怕我玩完都會賴死唔肯走，點知真係！Daddy媽me前後「唱」咗40「蚊」代幣，我玩咗火車、氣墊球、保齡球、掟波同埋打鴨仔之後，Daddy媽me話係時候走，但係我覺得仲未夠喉。於是，扭起計嚟，又坐地、又瞓地、又喊又叫，Daddy媽me點「氹」我都唔聽，媽me嚟最後一招︰自己走，我唯有死死地氣咁跟住走。

Yr.3_3/6/08_度高

你哋睇下，我幾高呢？有咁高！即係幾高呀？仲未夠長頸鹿高囉！

Yr.3_2/6/08_我自己

今日，我去遊樂場玩肥皂泡，再次自己吹波波，吹得越嚟越叻！我大過女喇，依家乜都想由我自己嚟做，就連過馬路都係。有次，媽me拖著我，當準備過馬路嗰刻，我突然撥開媽me隻手想自己走過去，媽me即刻捉住我，問我做乜唔拖著佢，我好狠咁答佢︰「我自己！」之後，俾媽me鬧，自此就無再咁做。其實，我嗰次咁做，係好唔啱，我仲細，有啲嘢係唔可以「我自己」，咁做會好傷Daddy媽me心。我知道啦！