Daddy話lee個情景似曾相識，就好似當年daddy入產房陪媽me生我o既時候，daddy握住媽me隻手打氣，媽me努力……好溫馨！今日，角色轉移，媽me陪產，所「產」o既唔係bb，而係「便便」。媽me陪我，為我打氣，我努力，一樣好溫馨。今次我痾便o既方式有啲唔同，皆因今個星期開始我有新突破，放棄一直堅持o既痾便姿勢－－站立式痾便（等我解釋下，即係著住條尿片企喺度痾），改用坐塔方式，喺運氣上好唔同，所以媽me從旁鼓勵，又讚我叻，我深受鼓舞，最終成功咗！其實，我都要多謝一位朋友，係佢激勵咗我坐塔痾便o既，佢就係諾禧妹妹。我一直以來堅持企喺度，就算明明坐喺度，一有便意，我就屹起身，企喺度運氣。有次喺酒樓飲茶，我唔理得咁多，喺席間屹起身就嚟。直至最近daddy得知諾禧妹妹告別塔仔，進攻大人市場，daddy帶我睇佢個blog（請參"告別黃色塔仔"），我好受感動，於是決心改變！多謝你，諾禧！事後，daddy將lee件喜事話俾auntie知，向佢道謝，佢哋一家人好興奮，反而激勵返佢哋！（詳情請參"讓你的光照在人前"）
我點解戴口罩？唔係想避開傳媒o既追訪，而係為咗公公。事關公公今日入院做小手術，我哋成家人去探佢。當大家到醫院後，都戴上口罩，我都被要求配戴。我原本堅決拒絕，但係當我知道探公公必須戴口罩之後，為咗見公公，我願意暫時放低美貌。點知……原來小朋友唔可以上病房，我有啲失望。不過，daddy念在我對公公o既孫女情深，用另類方法俾我見公公，就係用手提電話o既相機為公公影咗張相俾我睇。
最近，daddy媽me都鍾意聞我隻腳。等我都聞下先！咦？我隻腳真係有啲味喎！daddy話我以前一啲味都無，依家著得鞋多，終於焗出臭味嚟。不過daddy意見中肯，佢話臭味唔係好濃，要用力嗦先聞到。仲話腳臭同脾氣臭都好難頂，但係如果要揀，佢情願我腳臭好過。
我同姑姐好似樣，我係話廿幾年前o既姑姐。（唔小心，爆咗佢o既秘密tim，唔好意思！）嗰時我仲未出世，點知道？皆因嫲嫲話俾我知，仲有相為証tim。嫲嫲最近攞番姑姐細個o既時候啲相出嚟研究，研究結果發現我同姑姐近似度非常高！我喺度諗，到我廿幾歲o既時候，我個樣會唔會好似身旁o既姑姐咁樣呢？
Elvis Presley？Kitty？我唔知佢叫乜嘢名，但係我每次經過都會探下佢。我諗佢係太子貓，係屯門市中心某大藥房o既愛貓，我夠膽講每個屯門居民都見過佢，唔單止咁，仲有好多人都會停落嚟摸下佢，今日就有一位外藉人士o係我面前咁做過。其實，我都想摸下佢，不過daddy話我同佢相識未深，唔好摸佢，怕佢唔鍾意，咁樣無禮貌喎。咁我唯有望下佢啦！
Daddy話lee間係佢當年就讀o既小學，聽講以前排第五，依家第二，咁係咪話依家升格咗呢？daddy諗，應該唔係，因為依家唔係直接under該局，而係o係該局裡面under姓莊o既朋友。我諗lee個只係daddy個人意見，唔代表我o既立場。
今日，daddy帶我去沙灘又去遊樂場玩，玩完之後返屋企沖咗個靚涼。夜晚全家同公公做六十大壽，我又有得食生日蛋糕啦！恭喜公公，祝身體健康！講開恭喜，最近o既一個星期，頻頻聽到有人恭喜daddy媽me，又恭喜我就嚟做家姐，原來媽me有咗BB，我都唔係好知道做家姐係點做，請為我哋祈禱，好緊張呀！
公公婆婆最知道我對食物o既瘋狂程度，為咗滿足我無窮o既食慾，佢哋一早喺某酒店book咗枱－－三位buffet。呀……應該係兩位，我係免費o既，不過我o既食量可以拍得住公公婆婆。無論如何，多謝公公婆婆！今日，作戰日期到啦！等我對付……唔好講咁多，留番個口食嘢先！daddy喺度諗︰我個口仲可唔可以再大啲呢？
今日，收到一件非常意外o既禮物。Google寄咗件包裹嚟屋企，原來係一隻白色o既老鼠錢箱。daddy諗番點解會收到禮物，佢話應該係農曆新年o既時候upload過一段賀年短片 (鼠年賀歲大結集－祝你身體健康) 上香港YouTube喎，anyway，多謝Google！
LEGO係daddy細個時候o既至愛，今晚佢第一次喺寶箱攞出嚟招呼我，我見到佢打開個櫃，裡面隱約有好多套LEGO。不過，daddy淨係俾lee一套喺上個世紀八十年代頭買o既LEGO診所我玩，因為lee套最新淨，冇塵咁「濟」。一路玩o既時候，daddy同我講咗段古，話佢細個o既時候佢嫲嫲大讚佢好珍惜啲LEGO，將來可以留俾啲仔女玩，當時只係小學生o既daddy覺得lee個情景會好遙遠，估唔到眨下眼就喺今日發生！daddy諗起都有啲感觸……不過冇落下男兒淚。媽me今晚進修後返到屋企，見到我哋兩父女玩緊lee套LEGO，又勾起佢o既童年往事，不過媽me冇講古，只係同daddy講咗一句︰「你就好啦！我細個唔准買醫院、醫生嗰類玩具嚟玩，不過估唔到依家偏偏會喺醫院度做嘢！」
Google & LEGO
飲杯！lee杯係乜？係提子味迷你汽水，係daddy帶我去遊樂場途中買俾我o既！不過，daddy幫我開咗拉環蓋之後，我先發現原來係我鍾意o既糖，細細粒，好好食！daddy話lee啲糖佢細個時都有買嚟食，依家唔係度度都有得賣。等我袋喺褲袋度慢慢食先！
Posts
All Comments
