Day 91_31/3/06_三個月

公司經營咗三個月，業績雖然未係好明顯（因為我哋呢啲公司係睇長線嘅），但係我嘅管理技巧就有顯著進步。依家我認到晒公司上上下下嘅員工，我仲經常晚晚同佢哋訓話㖭，一講就講幾個字（梗係指到時間啦，因為我仲未學到本地語言），不過佢哋都聚精會神咁聽，聽到笑晒。

Day 90_30/3/06_攪革命

革命尚未成功，BB們仍需努力！

Day 90_30/3/06_雪條

今晚，Daddy同媽me喺我面前食雪條引我！

Day 89_29/3/06

 

Day 89_29/3/06

 

Day 88_28/3/06_「呵……！」

唔使避開，我個口一啲都唔嗅，我Daddy幫我聞過！Daddy藝高膽大，好嘢！

Day 88_28/3/06_減少夜生活

喺媽me悉心安排下，我噚晚好早就瞓。減少咗夜生活，係唔同啲！今朝8點幾就講早晨！ 

Day 87_27/3/06_壽星「公」

今日，阿公改咗名，叫做壽星公，我哋仲改咗食晚飯嘅地點。

Day 87_27/3/06_地下鐵碰著她

聽講有首歌咁唱︰「地下鐵碰著她……」雖然呢首歌幾舊下，不過搭地鐵對我嚟講就好新鮮！多謝阿公！

Day 87_27/3/06_夜生活

近排夜生活多咗，我晚晚兩、三點仲好精神，猛咁講嘢撩人玩，不過無乜人理我，可能公公婆婆同埋Daddy媽me唔慣夜生活。好似噚晚咁，只有Daddy留守到最後支持我，但係佢都唔係幾支持到我，三點就瞓咗。今日，我日頭就瞓番夠本。不過，Daddy媽me話夜生活無益，想我唔好做貓頭鷹。

Day 86_26/3/06

 

Day 85_25/3/06_抱抱

我依家鍾意媽me咁樣抱我！ 

Day 84_24/3/06_精彩的腓利

嘩！好精彩呀！Daddy最近有個精彩表演，逗得我好開心雀躍。就連我肚餓，喊得呼天搶地嘅時候，平時無嘢可以叫我收聲唔喊，居然佢呢個表演可以令我由喊變笑，厲害！乜嘢表演？你哋估下啦！俾啲hints過你，呢項表演個名叫「腓利」，而表演者表演完後佢條脷會有少許麻痺嘅，如果表演者技術稍遜嘅話，睇表演嘅人塊臉會俾佢啲口水滴濕！

Day 84_24/3/06_連環快拍

呢輯相，係我專心睇緊表演嘅時候，被記者拍到。

Day 83_23/3/06

 

Day 82_22/3/06_Baby Massage

媽me今日放工嘅時候，喺大街嘅流動圖書館借咗本有關嬰兒按摩嘅書番嚟。佢睇住本書，同我試做咗個session，我覺得好舒服，最重要係感覺到母愛！其實，呢個都係一個好好嘅親子活動呢！

Day 81_21/3/06_我似「寶寶」

今晚，媽me叫我做「寶寶」（發音係「捕」．「補」）。我初初都唔明做乜咁叫，後來我偷聽到佢哋講嘢，我先至知道點解。原來，阿公阿婆話我睇落有啲似我姑姐，媽me都係咁覺得，佢咪咁叫我囉！婆婆仲話似姑姐好，又白又可愛！你哋梗係想睇下我姑姐個樣貌頂呢？其實，佢有喺我個BLOG亮過相，好在我醒目有存檔，有興趣嘅話，請按這裡（Day 29）。

Day 80_20/3/06_唔使3個月學識外語

你哋睇呢張相嘅時候，唔好以為我最近沉默寡言，只不過今日講得太多啫！我今日猛咁講嘢，皆因我唔使三個月學識外語。所謂外語者，即係Daddy媽me唔識聽嘅語言，其實我要表達嘅係我好開心！話時話，佢哋嘅語言能力都好高，聽唔明都知道我好開心。我點知？因為佢哋喺度猛咁笑，佢哋係醒嘅！

Day 79_19/3/06

 

Day 78_18/3/06_著靚啲！

今日，嫲嫲同表姑媽、表姑姐嚟探我，一位從五羊城嚟，一位從香港大西北嚟，我一定要著靚啲歡迎，多謝晒！

Day 77_17/3/06_日瞓夜唔瞓

噚晚，我好興奮，眼仔睩睩，唔願瞓，直到兩點先乖乖入睡，攪到Daddy媽me差啲無覺好瞓。今日，我朝早食完奶，就不停瞓，阿婆驚我今晚半夜又唔瞓，到下晝兩點叫醒我沖涼同食奶，不過之後我又猛咁瞓，唔知今晚……

Day 76_16/3/06_管理哲學

最近九鐵管理層立立亂，我陳經理，都引以為鑑，為咗穩定本公司一班前線員工嘅軍心，決定「多笑、少喊」嘅強政厲治政策。董事局對我呢個英明嘅決定好滿意，今日起加我薪，由原來5安奶，加到5安半，增幅達10%。我會繼續努力，將公司業績帶到另一高峰，促進香港經濟欣欣向榮！
P.S. 遲下Time搵我做cover story，我會建議佢哋唔使特登影，呢張啱晒做封面啦！

Day 76_16/3/06_師母探我

多謝師母今晚賞面嚟舍下食餐便飯！不過，我喺大家食飯之前，攪咗劑大便，認真唔好意思！但係呢位客人唔介意，仲讚阿婆煮嘅餸好食。我諗應該無影響到大家食飯嘅情緒。好在我唔係煮飯嗰個，如果唔係下次Daddy媽me啲朋友就唔會上嚟食「便飯」！ 

Day 75_15/3/06_洗白白驚魂

好危險呀！今日我洗白白嘅時候好興奮，喺個盆度腳仔猛踢，差啲將個盆踢落地。連好有經驗幫我沖涼嘅阿婆，都嚇咗一跳！好在阿公夠機警，即刻扶住個盆，如果唔係我就會連人帶盆飛落地！感謝主！不過，我下次唔敢啦，都係等Daddy媽me帶我去游水嘅時候先至玩水好啲！:p

Day 74_14/3/06

Day 73_13/3/06_多謝河馬

好嘢！今日Daddy媽me過咗海搵河馬仔，買咗六件靚衫俾我。皆因佢公司開倉，有人傳佢搵夠喎。無論點都好，我會有好多新衫著。媽me就最感恩，因為今次係佢第一次親手揀衫買俾我，我哋收到親友所送嘅衫，又靚又多，著到依家兩個幾月仲未著晒，多謝大家！神真係我哋嘅供應者！最後，其他BB朋友，如果你哋都想執番啲平嘢，記住去搵河馬仔啦，全場兩折，聽講至到今個月底。河馬仔，多謝你！

Day 72_12/3/06_BB拳王

唔知點解啲大人咁鍾意幫BB帶拳套，今日難得對手可以輕鬆下，等我同佢哋玩下先……兩隻咁多，邊隻好呢？mmm……都係我最愛嘅右手先啦……jeep jeep jeep……

Day 71_11/3/06_跳彈床

我今日心情唔知點形容……好似好忟憎，又好似好興奮……Daddy媽me成晚都舞我唔掂，我諗我都係唔想咁，sorry！