Monday, May 26, 2008

Yr.3_26/5/08_娃娃裙

今日我返學啦!其實,未係正式上學,係辦理入學手續至真。當收到學校寄嚟有關通告o既時候,Daddy媽me不約而同,一睇到女裝校服稱為「娃娃裙」都不禁發笑。今日,買咗校服即場試著,好一條娃娃裙,好啱身、好醒目!仲有運動服o添!我哋成家人都好期待今日o既到來,daddy媽me呢幾個星期不時同我講今日係返學o既日子,我自己都知道返邊間學校o架,我o既講法係「培理稚園」。之前,有次外出晚飯,有位姨姨問我喺邊度返學,我答佢︰「稚園。」佢話︰「寺院邊有學返o架?」攪笑!講番今日,都有一件攪笑事發生。返學對於我嚟講,係同一班小朋友一齊玩,所以一到學校我就嚷著要玩。喺媽me忙於填寫各樣資料o既時候,我又想畫埋一份,於是媽me叫daddy帶我開去玩,我問daddy要嘢玩,daddy就話我要自己問下校長,我就即刻走到校長面前問佢,daddy都估唔到我真係會問。一啲都唔怕羞!不過……冇嘢玩,校長話遲啲當開學就可以玩。Posted by Picasa

3 comments:

Unknown said...

her smile seem to say, "See, I'm 大個女la."

Anonymous said...

條裙都幾好吖!
不過有啲似監獄風雲個啲喎!
講笑啫!
間學校係邊到架?幾時開學呀?讀K1喎?在恩真係全場最細,無乜邊個細得過佢嘞!

Zoe姨姨

Jane Chan 陳在恩 said...

Zoe姨姨︰
我未睇過監獄風雲,不過daddy話,對於依家一啲學生嚟講,校服可能真係變成咗囚衣。如果讀書變成咁樣,真係慘!依家啲人仲話要終身學習,如果唔鍾意讀書,咁咪即係判咗終身監禁?我要去改變lee個風氣!
間學校喺西灣河,我08年9月1日開學,讀K1,應該係最細嗰個,Daddy媽me話如果我做班長就攪笑!