Day 353_18/12/06_工展會

身為香港人，我梗係要嚟工展會支持下啦！ 

Day 352_17/12/06_看街狗仔

Hi! 狗仔，你喺度做乜呀？唔該晒你啦，你日日喺度看住lee條街，唔怪得我住得咁安心啦！多謝晒！ 

Day 352_17/12/06_黃口無飽期

索食聲孜孜……黃口無飽期……lee樣係其中一樣令我尖叫o既食物－－雪糕！

Day 351_16/12/06_眼花

你哋唔好轉啦！我花眼啦！ 

Day 350_15/12/06_唔好拉我

阿sir，唔好拉我呀！我好乖o架，冇份示威呀！我依家喺尖沙咀天星碼頭，唔係對面海嗰個。雖然我仲未有一年歷史，但係我都知lee個鐘樓係舊尖沙咀火車站o既鐘樓，好有特色呀！ 

Day 349_14/12/06_尋寶

原來網床外面有個寶藏，我住咗耐都唔知tim，等我尋下寶先……嗱，俾你哋睇下，係lee張網床o既說明書呀！ 

Day 348_13/12/06_買乜呀？

「先生、小姐，隨便睇、埋鏡拼拼！」呢種比較隨便o既服務手法，梗係唔適合喺攀山用品專門店出現啦！舅父就最叻，能夠提供顧客需要o既資訊，舅父，我又試吓先！(圖為毅成戶外用品港島區新分店，勝任大廈一樓) 

Day 347_12/12/06_木or膠?

婆婆同我玩舅父舅母送o既積木，我砌、我砌……乜lee啲唔係應該叫做積膠咩？ 

Day 346_11/12/06_早來了

我啱啱同daddy媽me去完中央圖書館返嚟……門鐘響喎，邊個嚟呀？原來係舅父……佢仲帶咗好多禮物嚟tim！多謝舅父舅母預早送生日禮物俾我同daddy！ 

Day 345_10/12/06_掛住我無？

Daddy去完吉隆坡5日返嚟，成日問我︰「有無掛住daddy無？」啲口音唔同咗ge？聽講daddy此行之後，生命受到沖擊，想知受到乜嘢沖擊，你哋可以去佢個blog到自己睇啦！我唔係咁方便喺lee度講……請按此。

Day 344_9/12/06_同學仔

媽me帶我去同一班舊同學影相，見到佢哋都好開心，講唔夠兩句就笑，成日都笑，特別係講番似前啲事就笑得仲辛苦，我諗返學真係幾開心o架，希望我第時返學都可以識到一班知心friends就好嘞！

Day 343_8/12/06_愛護牙齒

媽me話有一日收到一位奶粉推銷亞姨電話，佢問候我o既成長情況，真係好有心。佢仲提醒媽me可以為我o既牙齒開始清潔！唔錯ya、幾好、好有意思，又有「民意基礎」，(前一晚問過吓我咁啦！我冇話唔好。)真係福為民開！我梗係支持GST_Great shiny tooth啦！ 

Day 342_7/12/06_Merry Christmas

點解今日標題喺英文﹖皆因呢幅相係由一位外籍人士幫我哋影架！Thank you very much! My Friend! 

Day 341_6/12/06_大個女

據了解，一般女性喺比男性早熟。一睇就知啦，聽講圖左嗰位男士已經一歲有多，仲坐緊車仔，而我就揸緊大巴la！
仲有啊！我依家已經高過公公la！唔信你哋可以度吓架！ 

Day 340_5/12/06_我最似daddy

好多朋友仔都話我似daddy，頭形啦、面形啦、眉形啦、頭髮數量啦、神態啦、但我覺得我o既肥脷就最似嘞！ 

Day 339_4/12/06_單眼推單車

 

Day 338_3/12/06_聖誕樹

今日，參加完姐姐們o既畢業禮，之後趕下場，同爺爺嫲嫲、姑媽、姑姐一齊食晚飯，我哋仲影咗好多相tim。做乜棵聖誕樹同我頂帽咁似樣ge？ 

Day 337_2/12/06_天橋底

今朝，daddy媽me帶我去屋企附近個公園玩，我好興奮，因為係我第一次同daddy媽me去嗰度。我仲喺公園裡面撞到住喺我哋樓下一層o既姐姐，daddy媽me叫我同姐姐打招呼，姐姐多次強調佢叫做「靚女姐姐」。聽講行catwalk嗰啲都係靚女姐姐，唔知姐姐有無行lee條天橋呢？我一於好少理，經過天橋底，用Janewalk行去媽me度先！ 

Day 336_1/12/06_湯馬斯

我唔識湯馬斯盤旋，但係我識湯馬斯火車，呠呠…… 

Day 335_30/11/06_大膽超人

我越來越大膽，以daddy細個o既時候都唔敢試o既「超人式」嚟玩sir滑梯。

Day 334_29/11/06_脫鞋子

我愛脫鞋子，lee隻係我o既戰利品！ 

Day 333_28/11/06_努力向上爬

平時，我就係咁突破防線，衝出「安全玩樂區」，今日俾官方拍到片段…… 

Day 332_27/11/06_我愛公園

今日，daddy媽me同我去公園踩單車。雖然今日正式「新車落地」，但係我鍾情公園o既玩意，成個鐘頭走嚟走去，最終一次都無上過車。

Day 331_26/11/06_李公子

「Daddy，點解咁多男人圍住我ge？」「今日係李先生獻嬰嘛，我哋合照留念呀！」「哦，真係雙喜臨門喎！今日係我哋教會53週年堂慶，又係弟弟大日子，恭喜晒！哈利路亞！感謝主耶穌！」

Day 330_25/11/06_三輪單車

多謝婆婆送lee架三輪單車俾我！我平時坐慣四個轆o既車，唔知少咗個轆係咪好考平行力呢？踩完單車，下晝，媽me同公公婆婆帶我去尖沙咀玩，嗰度已經有聖誕o既佈置，好靚呀！