Yr.2_28/11/07_關心大事

離開香港幾日，無得睇中文報章，問公公借份報紙睇下先！咦……「環球片場空降南韓」？大件事！

Yr.2_23/11/07_我走啦！

今日係行程最後一日，我哋喺大阪市行下，傍晚o既時候就搭機走啦！路經火車站o既大堂，有個廣告叫啲家長帶小朋友去東京探阿奇，不過daddy媽me話遲啲有機會先同我去。去唔到東京阿尼玩，望下都好！我攞著阿頭企係度望咗好耐！講開阿頭，你哋可能唔知係邊位，其實佢係我隨身攜帶o既枕頭，我哋感情好深。除咗食嘢之外，佢可以話係我o既第二最愛，好鍾意摸住佢嚟瞓覺。不過，當我哋返到香港機場o既時候，發現唔見咗阿頭，曾經引起一度恐慌。媽me大為緊張，因為好難買得番阿頭，怕我會扭計。daddy媽me諗嚟諗去都唔知喺邊度同阿頭失散，唯一線索就係lee張相，證明阿頭當時仲喺度。最終點樣？哈！搵唔到！

Yr.2_22/11/07_銀河鉄道

銀河鐵路999？唔係呀！我哋今日去咗京都市郊嵐山，坐嵯峨野觀光鐵道o既小火車，觀賞保津峽同保津川o既美麗自然風光，lee個季節係欣賞紅葉o既好時機，好靚呀！到終點站龜岡之後，開過家庭會議，我哋決定坐觀光船回程，二百幾港元一位，都幾貴o架！不過，物超所值，沿保津川而下，足足觀賞咗兩個鐘頭o既美景。除咗河川流水聲外，就係船夫兼嚮導o既介紹（可惜聽唔明日文），去到一啲水流較平靜o既河段，更覺寧靜。其間，更落咗一場過雲雨，雨後彩虹出現喺兩峽之間，形成一條天橋，簡直係錦上添花！神，您好勁呀！不過，我都係聽番daddy媽me講咋，因為成程我瞓咗個幾鐘……其實，daddy媽me都係亂打亂撞，當決定咗出發日期同旅遊地點，先至詳細睇下有乜嘢玩，又唔知道有紅葉睇，後來至發現lee個景點係賞紅葉o既好地方，真係傻仔闖七關！

Yr.2_21/11/07_紅葉超人

今日去京都玩。我係紅葉超人！

Yr.2_21/11/07_好燒好食

食好燒，好味！lee間做法獨特，係老字號，喺京都好出名㗎。

Yr.2_21/11/07_京都料理

今晚食豪啲，試咗京都料理。媽me仲攪乜？食得未？

Yr.2_20/11/07_海遊館

今日去咗海遊館睇海洋生物，個水族館有幾層樓咁大！厲害！

Yr.2_20/11/07_我係Janio

我第一次打機，同Daddy玩Mario賽車，唔係用支筆，真係用呔盤。開車前仲影咗張車手英姿照，有鬚㗎！我係Janio！

Yr.2_20/11/07_日本姐姐x2

頭兩晚住package包嘅酒店，今晚開始住homestay，我哋成家都係第一次試，喺當地家庭親身感受下日本嘅文化。佢哋好好客㗎，特別係兩位姐姐，招呼我玩廚房玩具，大姐姐叫Honoka，細姐姐叫Kokone。我好掛住佢哋，返到香港仲間唔中呼喚Kokone姐姐！

Yr.2_20/11/07_Sushi Dinner

晚飯時間，一齊食壽司！

Yr.2_19/11/07_USJ探好友

噚晚好夜先至落機，到酒店已經係12點，我哋第二日先正式行程。今日，去咗日本環球影城玩，好好玩！USJ入面有我最鍾意o既卡通人物，有毛毛啦、did加（即係史力加）啦、Hello Kitty啦……Daddy媽me只係同我探我o既好朋友已經玩咗成日嘞！其實，因為我唔夠95cm咁高，所以只係可以睇表演，未有得玩啫。Daddy媽me為咗陪我，更加玩唔到過山車、ET、蜘蛛俠、Jurassic Park、回到未來……不過，我竟然可以玩大白鯊同埋烈火雄心！驚驚呀！

Yr.2_19/11/07_中日食物外交

今次去USJ，除咗盡情玩之外，我仲有一個任務︰攪好中日關係！我透過最耍家o既一招－－食嘢－－攪中日外交。果然「食物外交」係行得通！首先我買咗一大桶爆谷，仲用聖誕樹（加添節日氣氛嘛！）裝著 ，然後請日本娃娃食，之後佢送咗成筒糖俾我，我哋一邊食一邊睇芝麻街表演，最後我哋手拖手合照。由互不相識到拖手合照，整個過程雖然言語不通，但係透過食物，我打開咗中日關係！
（按此看看更多相片。）

Yr.2_18/11/07_雙腳離地

今日喺我人生中首次乘搭飛機，心情有啲緊張，話晒第一次雙腳離地幾個鐘頭嘛！Daddy媽me都有啲緊張，因為第一次帶BB上機，daddy仲大鄉里，一上機就將我放喺座位上，仲差啲幫我扣安全帶。我諗daddy早應該問下做空姐o既舅母，就無咁「瘀」！原來，我帶嗰條BB安全帶係連接去媽me條安全帶嗰度，我覺得好似袋鼠咁！
有人話帶BB去旅行好嘥，話佢哋未識嘢，都唔知做緊乜。不過，daddy媽me覺得就算我唔知發生乜嘢事，起碼佢哋有個難忘o既回憶，況且我知道去邊度旅行！係去「本」玩！

Yr.2_12/11/07_黃金寶

我係阿寶！唔係黃金寶，而係黃金海岸o既縮水寶姑姐！

Yr.2_8/11/07_阿尼公園

每位朋友都有一對眼，但係無一位望住鏡頭！

Yr.2_8/11/07_醜怪

lee兩位朋友仔好似成日都唔記得著褲仔，好醜怪！

Yr.2_7/11/07_面試

我今日o係筲箕灣某間幼稚園面試，我好鍾意lee度！我鍾意咁樣讀書呀！

Yr.2_5/11/07_再闖馬灣

舅父舅母今日放假同我去馬灣。圖中lee招叫「一字懸垂」，玩體操o既一定識，我一得閒就叫daddy媽me幫我練習。日子有功，表現先至咁好，其他喺屋企o既小朋友千祈唔好學！

Yr.2_4/11/07_工廠街秘密

講個秘密你哋聽︰工廠街盡處有一個好靚o既公園！好玩！

Yr.2_3/11/07_A24

近來，我陳經理四出見客，日理萬機。我試過一日走訪屯門、筲箕灣兩地，我都好鍾意去lee啲公司。「A24」係我喺lee間公司o既臨時商務編號，好一個「林吧」！未來幾年o既生意，我都未決定同邊個商務伙伴去攪！