Yr.3_4/4/08_太子貓

Elvis Presley？Kitty？我唔知佢叫乜嘢名，但係我每次經過都會探下佢。我諗佢係太子貓，係屯門市中心某大藥房o既愛貓，我夠膽講每個屯門居民都見過佢，唔單止咁，仲有好多人都會停落嚟摸下佢，今日就有一位外藉人士o係我面前咁做過。其實，我都想摸下佢，不過daddy話我同佢相識未深，唔好摸佢，怕佢唔鍾意，咁樣無禮貌喎。咁我唯有望下佢啦！

Yr.3_3/4/08_daddy的小學

Daddy話lee間係佢當年就讀o既小學，聽講以前排第五，依家第二，咁係咪話依家升格咗呢？daddy諗，應該唔係，因為依家唔係直接under該局，而係o係該局裡面under姓莊o既朋友。我諗lee個只係daddy個人意見，唔代表我o既立場。

Yr.3_31/3/08_恭喜有喜

今日，daddy帶我去沙灘又去遊樂場玩，玩完之後返屋企沖咗個靚涼。夜晚全家同公公做六十大壽，我又有得食生日蛋糕啦！恭喜公公，祝身體健康！講開恭喜，最近o既一個星期，頻頻聽到有人恭喜daddy媽me，又恭喜我就嚟做家姐，原來媽me有咗BB，我都唔係好知道做家姐係點做，請為我哋祈禱，好緊張呀！

Yr.3_22/3/08_食Buffet

公公婆婆最知道我對食物o既瘋狂程度，為咗滿足我無窮o既食慾，佢哋一早喺某酒店book咗枱－－三位buffet。呀……應該係兩位，我係免費o既，不過我o既食量可以拍得住公公婆婆。無論如何，多謝公公婆婆！今日，作戰日期到啦！等我對付……唔好講咁多，留番個口食嘢先！daddy喺度諗︰我個口仲可唔可以再大啲呢？

Yr.3_18/3/08_YouTube給我的老鼠

今日，收到一件非常意外o既禮物。Google寄咗件包裹嚟屋企，原來係一隻白色o既老鼠錢箱。daddy諗番點解會收到禮物，佢話應該係農曆新年o既時候upload過一段賀年短片 (鼠年賀歲大結集－祝你身體健康) 上香港YouTube喎，anyway，多謝Google！

Yr.3_13/3/08_耍乜？

我曾經喺公園見過啲公公婆婆咁樣做出一連串動作，所以今日我一嚟到公園，興致到，就耍咗一輪，笑到公公婆婆肚痛。

Yr.3_7/3/08_爸媽的童年

LEGO係daddy細個時候o既至愛，今晚佢第一次喺寶箱攞出嚟招呼我，我見到佢打開個櫃，裡面隱約有好多套LEGO。不過，daddy淨係俾lee一套喺上個世紀八十年代頭買o既LEGO診所我玩，因為lee套最新淨，冇塵咁「濟」。一路玩o既時候，daddy同我講咗段古，話佢細個o既時候佢嫲嫲大讚佢好珍惜啲LEGO，將來可以留俾啲仔女玩，當時只係小學生o既daddy覺得lee個情景會好遙遠，估唔到眨下眼就喺今日發生！daddy諗起都有啲感觸……不過冇落下男兒淚。媽me今晚進修後返到屋企，見到我哋兩父女玩緊lee套LEGO，又勾起佢o既童年往事，不過媽me冇講古，只係同daddy講咗一句︰「你就好啦！我細個唔准買醫院、醫生嗰類玩具嚟玩，不過估唔到依家偏偏會喺醫院度做嘢！」
Google & LEGO
這是Google特殊的紀念Doodle，以紀念LEGO積木在2008年1月的50週年。LEGO在世界各地極受歡迎，Google創辦人也是LEGO的fans。有興趣可看看此文"50th Birthday of the LEGO Brick"(英文)。

Yr.3_4/3/08_花甲

舅母幫我扮靚，佢喺我手指甲度整咗個花紋。我聽daddy話，將隻手咁擺，扮高貴女士帶鑽戒名錶咁o既post影相。邊個會妒忌？我諗會係其餘九隻肥手指，點解？你哋知o既！

Yr.3_3/3/08_飲杯

飲杯！lee杯係乜？係提子味迷你汽水，係daddy帶我去遊樂場途中買俾我o既！不過，daddy幫我開咗拉環蓋之後，我先發現原來係我鍾意o既糖，細細粒，好好食！daddy話lee啲糖佢細個時都有買嚟食，依家唔係度度都有得賣。等我袋喺褲袋度慢慢食先！

Yr.3_2/3/08_老友相聚

今日，跟daddy去佢初中同學o既聚會，daddy話機會難逢，可惜媽me要做功課而嚟唔到啦。不過，我又有機會同哥哥弟弟見面一齊玩，我哋小朋友仲收到姐姐專程由美國帶嚟o既禮物tim！多謝！如果時間長啲就好lu，或者下次嚟我屋企再玩過啦！事後，daddy問我感覺如何，我就答︰「好玩呀！」上哥哥屋企前，我玩sir滑梯，都係咁話！

Yr.3_26/2/08_當年學步

今日，公公婆婆帶我重遊舊地，果然好念舊！當年（按此看看）我就係喺呢度學行。等我模擬當年o既步法先……不過唔係好似……高咗。

Yr.3_25/2/08_平衡力

今日daddy媽me同我去大埔海濱公園玩，我踢波了得！好波！哈，自己讚自己。
我好有平衡力！

Yr.3_23/2/08_拾本好書

媽me經常帶我去圖書館借書，我都申請咗個圖書證用。借書前，點少得揀下圖書睇睇，等我攞本好書睇下先！你睇，我好用心咁睇。

Yr.3_18/2/08_新朋友

呢位弟弟係我今日去公園玩嗰陣識o既。傾開，發現原來佢媽媽o既朋友，我都識得o既！真係奇妙！我哋仲一齊影咗張相留念。我今次唔用專利V手勢，有禮貌咁跟弟弟做佢o既姿勢。

Yr.3_12/2/08_應節相

聽daddy講，daddy媽me佢哋細個o既時候，佢哋o既媽me都會叫佢哋影lee類相應下節，相中人往往有啲唔情願咁。不過，我唔係咁，反而係我叫daddy影。daddy話我有啲老套。

Yr.3_8/2/08_不是1520

大家唔好以為我玩緊十五二十，我做嗰啲動作，係表達我開心o既心情啫！因為媽me俾糖我食。

Yr.3_7/2/08_鼠頭拜年

專利V手勢，只適合兩歲o既小朋友使用，我啲朋友仔都係咁做勝利手勢。V手勢都未夠，等我借埋米妮個頭同大家拜年。

Yr.3_6/2/08_拜個早年

今晚係年三十晚，去爺爺嫲嫲屋企食團年飯。順便同大家拜個早年先。恭賀新禧！祝大家身體健康！多謝爺爺嫲嫲o既壓歲錢！

Yr.3_3/2/08_含羞

含羞。唔係我，我乃係話我身後o既熊。

Yr.3_2/2/08_在恩V手勢

請留意我o既指法，lee個係我o既Victory手勢－－Double V！我有專利，唔好諗住抄！

Yr.3_31/1/08_阿Boo

毛毛，我似唔似阿Boo？我啲尖叫聲同佢有得fight！有時喺公眾場所仲會攪到daddy媽me好尷尬。

Yr.3_27/1/08_OL

中環OL？我唔係。今日係星期日，佢哋放晒假。我只係喺度等巴士返教會啫，我每個星期日都喺度轉車o架。

Yr.3_24/1/08_唐裝鴨

唐老鴨，你又換咗衫等我嚟影相呀！阿尼樂園裡面o既一班朋友，你哋嚟咗香港咁耐，隨住唔同o既時節換裝，多謝你哋！同志們，辛苦啦！

Yr.3_19/1/08_阿主擦牙

我擦緊牙仔，講嘢唔係好清楚，其實喺片段裡面，我係話︰「王子……王子！王子！」我係叫緊幫我拍movie o既daddy，點解叫佢做王子？唔係因為我哋住喺屯門，我亦唔係姓鄧，而係因為我係阿主，即係阿尼樂園裡面嗰啲公主，我最近封daddy做王子！我好入戲，見到daddy返屋企，唔叫佢做daddy，而係改叫王子！所以，如果你哋喺街上面聽到人叫「王子！」，好有可能係我呼喚daddy唧。

Yr.3_14/1/08_Mic

我用私家mic唱歌！好聽唔好聽呀？

Yr.3_4/1/08_百力滋

百力滋好味道！

Yr.3_1/1/08_年年都有兩日

祝賀人生日，一般會講「年年都有今日」，但係祝賀我o既人，就要改一改，應該係「年年都有兩日」，因為慶祝daddy生日嗰日我都係主角！咁啱，又係貓貓生日蛋糕！